Humanitate Digitalak eta Hezkuntza

Humanitateen eraberritzea gertatu omen da eHumanitateetan edota Humanitate Digitaletan. Hasierako garaietako asmoak eta promesak, batetik, eta objektibotasuna, bestetik, ekarri dutena ikusi ondoren, galdera ezberdinak sortu dira Humanitate Digitaletan.

Helduek eta gazteek testuinguru digitalean hizkuntzak nola ikasten duten azaldu eta gero, kapitulu honetan, hizkuntzen irakaskuntzan konpetentzia digitalek eta baliabide multimodalek duten garrantzia azpimarratuko dugu eta ingurune digitalak ekar ditzakeen zenbait abantaila nabarmenduko ditugu idatzizko eta ahozko komunikazioan. Lehendabizi, hizkuntzak irakasteko on-line inguruneak aipatuko ditugu (1. azpiatalean). Ondoren, on-line ikastunitateen diseinua eta pedagogiak deskribatuko ditugu (2. azpiatalean).

Aurkari eta kontrako asko ditu teknologiak oraindik orain hezkuntzan; horrez gain, oraindik egiteko asko dago eta era anitzeko arazo ugari dakarzkio. Eta hala ere, azken urteotan izandako teknologiaren garapenak ia guztion eguneroko bizimoduan era guztietako aldaketak eragin ditu: lanean, aisialdian, hedabideetan, salerosketetan eta komunikazioan, besteak beste. Hezkuntza aldaketa horietatik aparte izan ez bada ere eta gaur egun irakaspraktika ugarik teknologiaren beharra badu ere, orain da unea ikuspuntu kritiko batetik teknologiak eta hezkuntzak bat egiteko.